скачать книгу бесплатно
Төшләреңә керәм инде.
2005
Казан
«Агачтан төштем мин мәтәлеп…»
Агачтан
төштем мин
мәтәлеп –
җирнең тарту көче җиңде…
…Мин ятам
ятакта
әйләнеп –
бүген яту көче җиңде…
2005
Казан
«Кояш кунган күзләреңә…»
Кояш кунган күзләреңә
Тутырып бер карыйм әле.
Яшәү моңы дәрьясыннан
Җаныма тын алыйм әле.
Синең күзләр Чулман кебек –
Иксез-чиксез, тирән-тирән.
Алсу таңнар яктысында
Бәхетемә якын киләм…
Гәрәбәдәй күзләреңдә
Ак болытлар агып бара…
Шул болытлар икебезне
Киләчәккә алып бара…
…Мөлдерәмә ике караш –
Җанның җанга кагылышы…
Күзләреңдә – минем күзләр,
Карашымда…
Синең күзләр чагылышы.
2005
Казан
Костюм кияргә микән?
Вакыт-вакыт күз төшерәм
Костюмың, чалбарыңа…
Килергә дә куркам хәзер
Мин синең яннарыңа.
Карашларың җитди-җитди,
Кыяфәтең акыллы.
Сине күргән егетләр дә
Бертавыштан «аһ» орды.
Читтән торып караганда,
Мөгаллимә кебек син.
Аспирантура бетергән
Бер галимә кебек син.
Депутат кыз шикелле син,
Җитәкче «апа» сыман.
Тик костюм, чалбар артында
Гади кыз ята сыман…
…Ут капкандай чабар идем
Мин синең яннарыңа…
Йон кабара, күзем салсам
Костюмың, чалбарыңа…
…Телне тешләп карап торам –
Нәрсә дияргә икән?..
Синең янга килер өчен,
Костюм кияргә микән?..
2005
Казан
Бу язларны сиңа бүләк итәм…
Бу язларны сиңа бүләк итәм,
Ул язларга сыйган барсы да –
Мәхәббәт тә, күңел сафлыгы да,
Җанны эретерлек ярсу да.
Бу язларны сиңа бүләк итәм,
Ул язларда яшәү моңы бар.
Күктән тамган тамчы чыңнарында
Сөенеч һәм бәхет тыны бар.
2005
Казан
«Табигатем минем кыр казыдай…»
Табигатем минем кыр казыдай…
Эх, очасы килә җирне ташлап.
Иксез-чиксез зәңгәр күк диңгезен
Йөзәсе лә килә бер колачлап.
Табигатем минем кыр казыдай…
Киң болыннар, иркен елгалары
Күңелемне тарта, ымсындыра…
Йөрәгемне камый еллар кары.
Табигатем минем кыр казыдай…
Кайнап торам, эх, очасым килә!..
Тормыш салган авыр арканнардан
Ычкынасым, бер бушасым килә!
Табигатем минем кыр казыдай…
Киң офыклар тарта күңелемне…
Җаным тоя: күккә очкач, җиргә
Киек каздай кире килеремне…
2005
Казан
Мин сине сагынганмын!
Күрдеңме соң баш өстеңнән
Ак болыт агылганын,
Шул болытлар арасыннан
Елмаю табылганын?..
Күрдеңме соң серле төннең
Зәңгәр моң ябынганын,
Тылсымлы ай нурларының
Шул моңга кагылганын?..
Күрдеңме соң уйсулыкта
Көмеш күл чагылганын,
Бер аккошның, ярсый-ярсый,
Канатын кагынганын?..
…Дөньяны кочардай булып,
Мин сине сагынганмын!..
2005
Казан
Су ташый кыз…
Су ташый кыз Ак чишмәдән,
Көянтә, чиләкләре…
Көянтәсен кочып алган
Ак шома беләкләре…
Су ташый кыз Ак чишмәдән,
Сусавын басмакчымы?..
Юлына сөйгәне чыкса,
Йөрәген ачмакчымы?..
Су ташый кыз Ак чишмәдән,
Тамчыдай адымнары…
Мөлдерәмә күзләрендә
Саф чишмә чалымнары…
Су ташый кыз Ак чишмәдән,
Офыкка карый-карый…
Толымлап үргән чәчләрен
Җиләс җил генә тарый…
Су ташый кыз Ак чишмәдән…
Эх, чишмә булсаң икән!..
Пар чиләкнең ирнәвеннән
Су белән тулсаң икән!..
Су ташый кыз Ак чишмәдән,
Иренендә чык суы…
Юлына сөйгәне чыкса
Кузгалыр җан ярсуы…
2005
Казан
Иртә яздан мине эзлә син…
Килеп кердек сары көзгә дә…
Гамьле каен җиргә тезләнә…
Төссезлектә җаным югала,
Буш тарафтан мине юллама.
Бураннардан мине эзләмә,
Юлыкмассың минем эзгә дә…
Кулга алсаң, кар да югала…
Ак карлардан мине юллама…
Тереклекне саклар өчен лә,
Бөре тибә кайры эчендә.
Умырзаяларны өзмә син,
Иртә яздан мине эзлә син…
2005
Казан
«Мин җансыз яшәдем бугай…»
