скачать книгу бесплатно
Күңелләрне телеп төшә,
Йөрәкләрне мең яралый
Синең юклык, салкын бушлык,
Илдар абый, Илдар абый…
Ап-ак кышның моңлы көне.
Бөтен җаным гамьгә тарый.
Синсез авыр. Карлар явар,
Илдар абый, Илдар абый…
Әнә дымлы тәрәзәдән
Моңсу итеп кояш карый.
Ул да сине сагынадыр,
Илдар абый, Илдар абый…
…Язлар җитәр, карлар китәр,
Тамчы тамар бертуктамый.
Күзем яшьле. Кемдер дәште:
«Илдар абый, Илдар абый…»
Яфрак булып шыбырдашкан
Гомерләрне еллар саный…
Кол Галидәй басып тора
Илдар абый, Илдар абый…
2004
Казан
Җибәрмим
Син генә, син генә
уемда.
Син миннән китәргә
җыенма.
Сөюдән тилергән
җүләр мин.
Беркая, беркая
җибәрмим!
2004
Казан
Хаос
Башым тулы очы чыкмас уйлар.
Күзне йомам. Алда – караңгылык.
Тонык шәүлә яткан көн өстенә,
Нигә шулай, нигә караңгы нык?..
Кабызыгыз утны, кабызыгыз,
Кая кояш, кая ай гынам?..
Йолдызлар да сүнеп беткән мәллә? –
Караңгыда ялгыз кайгырам.
Кычкырамын, кайнар яшем тама
Салкын хаос, бушлык эченә.
Тавышымнан үз колагым тона,
Тартылса да кыл бар көченә.
Үзәкләрем өзелергә җитте,
Кабер кебек тып-тын, караңгы.
Берәр вакыт, дөм пәрдәсен ертып,
Сыңар йолдыз гына карармы?..
Башым тулы очы чыкмас уйлар…
Шәүлә яткан көнем өстенә.
Кичә янган кояш, йолдызларга
Төн сихерен кем соң өстерә?..
Күзне йомам. Алда – караңгылык…
Бер шырпы сыз бушлык эченә.
Ачынудан бәгырь, күңел сына,
Тартылса да җан бар көченә.
2004
Казан
Китәсең дә югаласың…
Китәсең дә югаласың
Имтихан арасында.
Берүзем утырып калам
Таш Казан каласында.
Уку гына синең уйда,
Минекендә – син генә.
Бүлмә тәрәзәмә чиртә
Кышкы суык җил генә.
Кар сибәли ара-тирә
Син киткән сукмакларга.
Артыңнан җилдерер идем
Ярсу, уйнак атларда…
Уем атлардан да җитез –
Синнән алда чаба ул.
Сезнең авыл юлларына
Җан нурымны яба ул.
Синең өең монда гына,
Минеке – әллә кая.
Бер көнгә килеп китәсең,
Туң юлдан тая-тая.
Әллә каян, әллә нидән
Бер сәбәп табасың да,
Китәсең дә югаласың
Имтихан арасында.
Буранга кереп чумасың,
Күкләргә ашасыңмы?..
Сәбәп-сәбәп дигән булып,
Әллә алдашасыңмы?..
Мин – беркатлы, мин ышанам…
Тиздән янга килерсең,
Сагыну-сагышларымда
Ак кар булып эрерсең.
2005
Казан
Ярый, мине кызганма да…
Көннәр буе көтеп ятам
Синең шалтыратуны.
Туктат инде, эндәшмичә,
Җанны аптыратуны.
Ярый, бер төн йокламадым,
Бер төн өйдән чыкмадым.
Телефондагы сәгатьтән
Минутларны чутладым.
Кесә телефоным дәшми,
Бер тын-тавыш чыгармый.
Синең хәбәреңне көтеп,
Ничек түзәдер армый?
Шалтыратуыңны көтеп,
Йөрәкләрем сыза ич.
Ярый, мине кызганма да,
Телефоным – кызганыч.
Мине бер уйламасаң да,
Аны бер жәлләр идең…
…Кинәт телефон аркылы:
«Исәнме! Хәлләр?..» – дидең.
2005
Казан
Чуен Гәрәй малае
Мәгъсүм Гәрәевкә
Аслы-өсле заманасы,
Бар ярлысы, бар бае…
Дусларга, шәкертләргә бай
Чуен Гәрәй малае…
Зәңгәр күкнең кояшы бар,
Серле төннең ак ае…
Әллә каян балкып килә
Чуен Гәрәй малае.
Бөтен җирне айкап чыккан
Гади татар агае…
Гел кешеләр арасында
Чуен Гәрәй малае.
Дөнья көткән ир-атларның
Бар чанасы, бар тае…
Кулда – каләм, җанда – ялкын –
Чуен Гәрәй малае.
Гомер булгач була инде
Алае да болае…
Җиде – җитмеш арасында
Мәгъсүм Гәрәй малае.
2005
Казан
«Дәшкән идем, дәшкән идем…»
Дәшкән идем, дәшкән идем –
Ишетмәдең, ишетмәдең.
Ябып куйдың, бикләп куйдың
Күңелеңнең ишекләрен.
Баккан идем, баккан идем –
Карамадың, карамадың.
Арабызда ята мәллә
Елан төсле кара адым?..
Берәр кайчан дәшәреңне,
Багарыңны беләм инде…
Үз җанымны өннән алып,
