скачать книгу бесплатно
Рухы белән бердәм калган,
Сатылмаган горур милләт!
Яңа дәүләт төзибез, дип,
Эш атыдай җиксәләр дә,
Кара ярлыкларын тагып,
Ил дошманы итсәләр дә,
Кулына таяк тоттырып,
Кара яуга кертсәләр дә,
Юлбарыстай көчле булган,
Сатылмаган горур милләт!
Хөррият килде дигәчтен,
Чит хокуклар таксалар да;
Сепаратист, дип гаепләп,
Читлек вәгъдә итсәләр дә;
Мәктәпләребезне ябып,
Авыр йозак элсәләр дә;
Һич бирешмәс, исән калыр,
Иншаллаһ, горур милләт!
Якты өмет
Шәҗәрәләр әле барланмаган,
Кулъязмалар илгә кайтмаган.
Ил тарихын һаман яздырабыз
Әтрәк-әләм – җиде ятлардан…
Өзәңгеләр ләкин тутыкмаган;
Тулпар атлар кешни утарда…
Булат кылыч чыңы кайтавазы
Тынычлык бирмәс безгә йокларга!..
Өеп ягар чаклар җитәр әле
Чытырмандай дошман байракларын.
Тамырларда тибәр яугир каны, —
Күтәрелер татар җайдаклары!..
Дала җиле тәнгә ятмыни соң,
Дөрләгәндә көрәш учаклары?!
Караңгылык янә артта калыр,
Таң нурлары бизәр офыкларны.
Каурый каләм
Мин үрелдем тагын аңа,
Бүген күңелем тулып.
Ак кәгазьгә тамды йөрәк хисе,
Каурый эзе булып.
И сердәшем, коткар, дидем,
Тирән сагышлардан.
Тавышлардан-гаугалардан,
Яра-ялгышлардан.
Саркыды уй үткәннәрдән,
Саф чишмәдәй ургып.
Бүгенгедән киләчәккә
Йөзәм каурый булып.
Бөтерә-бөтерә алып китте
Мине ярсу ташкын.
Хыял канатларын җилпеп,
Гарешләргә аштым.
Юк шул, юк шул… Шау-шу тулы
Урамнарда иман гаме.
Салкын карашларда чагыла бары
Ымсындыргыч дөнья яме.
«Чәчәкләргә манып кылкаләмен…»
Чәчәкләргә манып кылкаләмен,
Яз яңарта җиһан сурәтен.
Син бит мине үткәннәрдә калган
Язда яши-яши яши өйрәттең.
Андый язлар инде бүтән килмәс,
