Nura boya dünyani – Галимкаир Мутанов

Hörmətli oxucular! Son illər iki qardaş ölkə arasında bütün sahələrdə qarşılıqlı münasibətlər yüksək səviyyədə inkişaf edir, bu da, əlbəttə ki, bizi çox sevindirir. Bir kök, ümumi tarix, ədəbiyyat və mədəniyyət Azərbaycan və qazax xalqlarının daha da doğmalaşmasında, yaxınlaşmasında xüsusi yer tutur. 2016-cı ilin aprelində Azərbaycan Milli Elmlər Akademiyasında Türk dünyasının fəxri olan böyük şair və ictimai xadim Oljas Süleymenovun anadan olmasının 80 illik yubileyi keçirildi. Həmin tədbirdə mən də iştirak edirdim və xalqlarımızın nə qədər doğma olduğunun, onun yaradıcılığına və şəxsiyyətinə nə qədər böyük dəyər verdiyinin şahidi oldum. Həmin tədbirdə O.Süleymenovun kitablarının Azərbaycan dilinə çevirmiş gözəl qəlbli vətəndaş, istedadlı şair, Türk dünyasının cəfakeşi Nizami Zöhrabi ilə tanış oldum. Təbiidir ki, ünsiyyətimiz zamanı Nizami Zöhrabi ilə xalqlarımız arasındakı mədəni və ədəbi əməkdaşlığın daha da inkişaf etdirilməsi barədə fikir mübadiləsi apardıq. Bir aydan sonra o, qonağımız oldu, Oljas Süleymenovun Almatıda keçirilən yubileyində çox gözəl çıxış etdi, ona təbrikini çatdırdı. Nizami Zöhrabi həm də Əl-Fərabi adına Qazaxıstan Milli Universitetində müəllimlər və tələbələrlə, Qazaxıstan Yazıçılar İttifaqında həmkarları ilə görüşdü, gələcəkdə nəzərdə tutulan tədbirlər və əməkdaşlığımızın perspektivləri barədə fikir mübadiləsi apardı. Əlaqələrimiz o Azərbaycana qayıdandan sonra da davam etdi. Mizami Zöhrabi təmənnasız olaraq mənim poetik yaradıcılığımdan nümunələri doğma dilinə çevirməyə başladı. Təəssüf ki, iyun ayında Nizami Zöhrabinin qəfildən dünyasını dəyişməsi barədə gözlənilməz xəbər aldıq. Türk dünyası və mədəniyyəti, ədəbiyyat gözəl qələm sahibini, təəssübkeş insanı itirdi. Bununla əlaqədar mərhumun ailəsinə və bütün Azərbaycan xalqına dərin hüznlə başsağlığı verirəm. Ancaq bir məsələdə təskinlik tapıram ki, Nizami Zöhrabi ilə planlaşdırdığımız və başladığımız layihələr yarımçıq qalmayacaq, onun dostlarının yardımı sayəsində davam etdiriləcək. Mən gələcəkdə iki qardaş xalq arasında yüksək səviyyəli əməkdaşlığın daha da inkişaf etdirilməsini, həm də doğma Azərbaycan xalqına daha böyük xoşbəxtlik və sonsuz rifah arzulayıram. İnanıram ki, bu kitab oxucular tərəfindən mədəni və ədəbi əlaqələrimizə kiçik bir töhfə kimi qiymətləndiriləcək.