BİZ QADINLARLA HƏMİŞƏ NƏZAKƏTLİYİK – Raymon Keno

“Biz qadınlarla həmişə nəzakətliyik” əsəri məşhur uşaq nağılının – “Ağca və yeddi cırtdan” əsərinin personajlarının say nisbətini xatırladır. Yeddi kişi və bir qız. Lakin bu əsəri nağıl adlandırmaq mümkün deyil. Yeddi irland üsyançısı inqilablar tarixində qəbul olunmuş qaydalara görə poçt şöbəsini ələ keçirirlər və bütün işçiləri binadan çıxarırlar, silah tətbiq etməkdən belə çəkinmirlər. Binanın zəbt edilməsi zamanı qadın otağında ilişib qalan və ətrafda nə baş verdiyindən xəbəri olmayan poçt qulluqçusu Gertidən başqa hamı çıxarılır. Bu bakirə ingilis qızının aşkar olunması üsyançıların bütün planlarını, davranış qaydalarını pozur. Yüksək məfhumlarla danışan, özlərini vətənpərvər və qəhrəman kimi aparmağa çalışan üsyançılar, bu qızcığazın öz qadın cazibədarlığından istifadə edərək qurduğu seksual oyunların nəticəsində ciddi-cəhdlə gizlətməyə çalışdıqları ən aşağı, ən bəsit instinktlərinin üzə çıxmasına mane ola bilmirlər. Yeddi savadsız, kobud, fiziki cəhətdən güclü, İrland üsyançısı və bir tənha, köməksiz ingilis qızının “qarşıdurması” gözlənilməz situasiyalara gətirib çıxarır.