Қувғиндаги кекса қирол – Гайгер Арно

Арно Гайгер 1968 йилда Брегенц (Австрия)да туғилган, австриялик истеъдодли замонавий ёзувчилардан бири. Унинг кўплаб ҳикоя, қисса ва романлари чоп этилган бўлиб, турли мукофотлар билан тақдирланган.2011 йилда нашр этилган «Қувгиндаги кекса қирол» қиссаси адибга нафақат Европа, балки дунё миқёсида ҳам шуҳрат келтирди. Асар тез орада кўпгина жаҳон тилларига таржима қилиниб, китобхонлар меҳрини қозонди.Унда муаллиф Алцҳаймер касаллигига дучор бўлган кекса отаси ҳақида ҳикоя қилади. Маълумки, Алцҳаймер мия хасталиги бўлиб, 1906 йилда немис шифокори Алоиз Алцҳаймер томонидан аниқланган. Хотиранинг аста-секин сусайиб, йўқолиб бориши касалликнинг дастлабки асосий белгиси ҳисобланади. Алцҳаймер деменция(ақли заифлик)нинг кенг тарқалган шакли бўлиб, кўпроқ кекса ёшдаги кишиларда учрайди.Ушбу асар юксак ахлоқий-тарбиявий аҳамиятга эга. Қиссада ёзувчи ўз падари бузрукворининг ҳаёти, ижтимоий келиб чиқиши, туриш-турмуши, ўй- кечинмалари, ҳис-туйғулари ва дарду изтироблари ҳақида бир оз ғамгин, бир оз қувноқ ва бир оз киноя билан ҳикоя қиларкан, одамлар, оила, шахс ва жамият ўртасидаги ўзаро муносабатларни моҳирона очиб беради, оилавий ва ижтимоий масъулият, тил ва хотира, ватан ва ўзлик, эркинлик ва инсон шаъни, қадр-қиммати сингари долзарб мавзуларда баҳс юритади, кишиларни ўзаро меҳр- оқибатли, инсоф-диёнатли бўлишга чақиради.