скачать книгу бесплатно
Молитва четвертая
из той же службы
Преподобнии и богоноснии отцы наши Антоние и Феодосие. К вам мы, грешнии и смиреннии, яко к теплым заступником и скорым помощником и известным предстателем, усердно прибегаем, смиренно просяще вашея помощи и заступления, в бездне зол и бед погружаемии, яже на всяк день и час нам и от человек лукавых приключаются, и от духов злобы поднебесныя, всегда и везде и всякими образы погибели душ и телес наших ищущих, находят на ны. Известны бо есмы несумненно, коль великое к милосердому Богу имате дерзновение: еще бо на земли между странствующими к горнему отечеству пребывающе, велию силу благодати Божией, устами и руками вашими чудодействующей, в себе показасте, яко и огнь с небесе, по подобию Илиину, на показание места, на немже имяше быти основана, на честь и всегдашнее Бога и Божия Матере славословие, великая церковь Печерская, и росу, по образу Гедеонову, на очищение и вечное прославление тогожде святаго места низведосте: такожде вемы, коль многое множество мужей и жен, из разных стран и народов, скорбящих и напаствуемых или различными тяжкими болезнями одержимых, или под бременем насилия и притеснения, неудобь носимым, упадающих и желания своего отчаивающихся, вашими молитвами и заступлением получиша скорое себе облегчение и избавление. Аще убо вся та помоществования, еще в смертном суще странствовании, бедствующим милостивно подавасте, кольми паче днесь, егда уже всемогущей предстасте Троице и большее приясте дерзновение, во еже молити Ю о нашем недостоинстве, и нас, в бедах и печалех сущих, утешати, в тяжких нуждах и напастех по нас ратовати, в злоключениих и бедствиих нас заступати и защищати. Сего ради и мы, столь многими враждебными наветами, озлоблениями и коварными злоумышлениями отвсюду угрожаемии и тиснимии, вашему теплому и сильному по Бозе вручаем себе покровительству и защищению, и усердно молим благостыню вашу, сохраните нас неврежденных от всех бед и зол, наипаче же от бесовских козней и хитростей, льстивых подступов и наглых нападений, да не будем им в поругание и посмеятельство, но тако их крепкою вашею помощию от нас отжените, якоже во дни оны от обители отгнасте их, многия пакости иногда деющих. Сицевая же их неполезная укротивше на ны востания и устремления, тако нас утвержденных в вере, надежди и любви и постоянных соделайте, да николиже нами каковое возобладает недоуминие или сумнение в тех, яже святая мати Церковь веровати поучает и исповедати дерзновенно повелевает: надежду нашу на Господа Бога в душах наших весом и мерою правды и милости Божия сице устройте, яко да ниже излишне уповаем обещанная от Бога без труда и подвига восприяти, ниже, зряще великия прегрешения и тяжкая законопреступления, весьма Божия милосердия отчаяваемся. Любовь в сердцах наших сице утвердите и достойну соделайте, да ничтоже земное и скорогибнущее паче Бога, вся сотворшаго и вся в Себе содержащего, ниже помышляем, ниже желаем, ниже предпочитаем. Чувства наша душевная вкупе и телесная в таком благоустроении и боголепной мерности на всяк день и час удерживайте и снабдевайте, да теми никогдаже благаго и человеколюбиваго Бога прогневаем. Разум уцеломудрите, да он паче о Бозе, Его вездеприсутствии и благопромышлении помышляет, неже о временных и ничтоже сущих печется. Развращенную волю нашу выну исправляйте, да николиже хощет, еже хотению Божию сопротивляется, но теми да удовляется и в сих безмятежно и безпечально да пребывает, яже суть Богу угодна и приятна, человеку же спасительна и полезна. Память истрезвляйте, да та непрестанно представляет уму и сия, имиже всемилостиваго прогнева Бога и Его благоутробие раздражи, и оная, яже всякаго человека, кроме всякаго сумнения, по временной сей жизни ожидают: к сим же и отечества вашего не забывайте, но в мирном устроении пребывати ему у престола величества Божия непрестанно ходатайствуйте. Православное воинство, и вся люди, сущия в державе мирных и безпечальных сохраните, и от всякаго, злаго обстояния вскоре избавите. Егда же приспеет наше от временнаго сего жития отшествие и к вечности преселение, сице нам в помощь предстаните и от насилий вражиих свободите, якоже предстасте иногда Еразму монаху, в тяжком смертном бедствии обретавшемуся, и сице сердца наша к истинному покаянию и жалению о грехах подвигнете, якоже и онаго сердце подвигосте, иже в истинном покаянии от здешних к Богу отиде, да и мы в чистем совести нашей свидетельстве, Пресвятей и Неразделимей представше Троице, прославляем Ю купно с вами и всеми святыми в безконечныя веки. Аминь.
Молитва пятая
из службы
Преблаженнии, приснославнии, преподобнии отцы, святии первоначальницы Печерстии, Антоние и Феодосие, свыше Богом дарованнии, двоице благодатная, союзом совершенства, любовно к Богу и ближнему соединенная, не точию в жизни сей временной друголюбне трудившиися о пользе душевней иночествующих и в мире благочестно живущих, но и по отшествии своем в жизнь вечную обещавшиися пособствовати всем и молитися ко Господу Богу и Пресвятей Богородице о спасении всех, наипаче грешников, от нихже первый есмь аз. К вам, угодником Божиим и Пресвятыя Богородицы, яко истинным ходатаем спасения притекая, смиренно молюся: предстаните мне в помощь, узами грехов связанному, и помолитеся о мне, купно же, и всех наследников богоугоднаго вашего жития и снаследников Царствия Небеснаго подвигните на многомогущия молитвы: всех бо вас недостойный призывати на заступление дерзаю, желая от всех грехов моих вами свобождение получити. Вси преподобнии отцы Печерстии, богоугодно трудившиися и нетленно в пещерах почивающии, святии иерарси, священноначальницы, священноиноцы, постницы, мученицы, девственницы, чудотворцы, вы есте род избран, царское священие, язык свят, люди обновления, известителие добродетелей из тьмы тленныя сея жизни Призвавшаго вас в чудный свет: вас бо ни земля потаила есть, аще же киих и потаила под спудом почивающих, но верую, яко всех небо прияло есть, и яко славы вашея исповести, тако и имен ваших исчести ми невозможно, множеству бо звездному уподобистеся, разве Сам исчитаяй множество звезд и всем им имена нарицаяй, исповеданный от вас на земли Царь славы, Христос, всех вас, преподобных Своих, по имени написанных на небесех, исчитает и совершенно исповедует пред Отцем Своим Небесным: помозите мне грешному, в сокрушении и смирении сердца моего припадая, молюся вам: свет суще миру и светильницы из-под спуда пещернаго поставлени душами на свещнице небесном, осиявайте мя, омраченнаго наветы вражиими, светом благодати свыше, да в нем ходя не преткну о камень ноги моея. Вы есте сосуди в честь избраннии, исполненнии благодати Божия обильно, молю: сподобите мя грешнаго от исполнения вашего прияти. Вы есте соль земли, аз же есмь земля, будите мне солию, соблюдающе всецело душу и тело мое от согнития греховнаго. Вси вы, преподобнии Печерстии, врачеве благодатнии, исцеляющии всяк недуг и всяку язю в людех, молюся вам, святии: исцелите и моя душевныя и телесныя язвы, да достойно прославляю Бога в души и телеси моем, всех вас во всем благодаря. Вы бысте алчущии и жаждущии правды, ныне же блаженнаго обеда в Царствии Божии достойно насыщаетеся, смиренно колена сердца моего преклоняя, молю вас: подадите и мне, алчущему и жаждущему тояжде благодати, поне от крупиц падающих от трапезы вашея, и насытите душу мою тщу и душу алчущу исполните благ. О всещедрии господие, всех вас добрый Пастырь пасет, и ничтоже вас уже лишит: вашими благоприятными молитвами соделайте, да и мене, аще и недостойнаго, ничтоже лишит благо; можете бо, преподобнии вси, всем вся, о укрепляющем всех вас Иисусе Христе. Будите, угодницы Божии, и мне окаянному вси вся, да с прочими всеми и мене, к вам всеусердно притекающаго, приобрящете. Аще бо много может молитва единаго праведнаго поспешествуемая во благое, кольми паче вас, праведных и преподобных многих, могут молитвы вся у всемилостиваго Бога. Не два или трие во имя Христово собрани есте, и не два совещастеся на земли просити во имя Христово Отца Небеснаго, но велие множество вас, о преподобнии: помолитеся о мне едином от грешных: аз же верую, яко Бог, прославляемый в совете всех вас, преподобных Своих, услышит прошение собранных и совещанных во имя Его. Изгубих окаянный грехопаденьми моими благодать Божию: вы, святии Печерстии, множеством своим поищите, молю, воистинну обрящете. Увы мне! Затворены предо мною недостойным двери милосердия: вы, преподобнии угодницы Божии, вси потолцыте, и отверзутся ради вас мне грешному, яко да и аз к вашему множественному числу, с большею вашею славою, вашими святыми молитвами причтен быти сподоблюся. О достохвальнии, преподобнии отцы Печерстии! Вы есте радование Царя Небеснаго, вы благоприятная жертва Вышняго, вы граждане новаго Иерусалима, вы наследницы Царствия Божия: тако бо вси текосте, яко и желаемое постигнусте. Молю, и моим ногам благое течение в пути заповедей Господних соделайте, и желаемое постигнута грешнаго мене сподобите вашими многомощными ходатайствы: да, вшед в дом царствия вечнаго, возрадуюся и возвеселюся, благодаря всех вас преподобных о таковой любви вашей ко ближнему, и купно с вами восхвалю и возвеличу во хвалении единаго в Троице Пресвятей, от всея твари на небеси и на земли хвалимаго, благословимаго и покланяемаго всемилостиваго Бога, Отца и Сына и Святаго Духа, с Пречистою и Присноблаженною Девою Богородицею, ныне и присно и во веки веков. Аминь.
Тропарь преподобным Антонию и Феодосию Печерским, глас 4
Звезды мысленныя, просиявшия на тверди Церковней, иноков Российских основание песньми, людие, почтим, радостныя похвалы сим воздающее: радуйтеся, преблаженнии отцы, Антоние со Феодосием богомудрым, присно молящиися о возследствующих и чтущих память вашу.
Ин тропарь, глас 3
Двоицу начальных российских светил почтим, Антония, Богом посланнаго, и Феодосия, Богом дарованнаго: тии бо первии, равноангельным в России житием просиявше от гор Киевских, осветиша отечествия нашего вся концы, и путь к Небеси правый многим показаша, и, первоотцы иноком бывше, лики спасаемых Богови приведоша, и ныне, предстояще в вышних немерцаемому Божества Свету, молятся о душах наших.
Кондак, глас 8
Двоицу великих отец и правило иноков я светлое, умныя зари онебесившия Российскую Церковь, кто по достоянию хвалами воспоет? Тии бо Престолу Божию предстоят. Но, яко имущии дерзновение ко Святей Троице, Антоние преблаженне и Феодосие приснопамятне, молитеся о молебная к вам приносящих и любовию песньми вас ублажающих.
Ин кондак, глас 2
Твердыя столпы благочестия, недвижимая иноческих законоположений основания и необоримыя стены Российския восхвалим: Антония, возлюбльшаго Бога, и Феодосия, возлюбленнаго Богом: труды бо онех и постническия подвиги прият паче всякаго всеплодия Един во святых прославляемый.
Величание
Ублажаем вас, преподобнии отцы Антоние и Феодосие, и чтим святую память вашу, наставницы монахов и собеседницы ангелов.
3/16 сентября
Блаженного Иоанна Власатого, Ростовского чудотворца (1580).
Молитвы блаженному Иоанну Власатому, Ростовскому чудотворцу
Молитва первая
из книги молебных пений
О всесвятый угодниче Христов, Иоанне преблаженне, земный ангеле и небесный человече! Ты от юности твоея мир суетный возненавидел еси, и иго Христово со тщанием нося, заповеди Того совершенне исполнил еси, и по многих трудех твоих к велилепному Божия славы престолу преселился еси. Тому убо предстоя, моли Пресвятую Троицу подати всем мир и здравие, град же наш Ростов и вся грады и страны и вся православныя христианы избави от бед душевных и телесных. И якоже при честней раце твоей непрестанно содеваются чудеса, тако и впредь оными не оставляй нас, яко да всегда ти зовем: радуйся, Иоанне всеблаженне, скорый наш помощниче, и приим от нас приносимая тебе моления, испроси у Христа Бога обрести нам велию милость. Аминь.
Молитва вторая
из книги молебных пений
О всеблаженне Иоанне чудотворче, человече Божий и верный рабе Господень! Ты еси праведник, яко финикс процветый, насажденный во дворех Господа своего, присно многоразличная благодатию Божиею чудеса источаяй. Твоим чудотворением град Ростов, в немже трудолюбно житие твое скончал еси, во всех странах хвалится. О всечестная главо, угодниче Божий, Иоанне блаженне, дивный чудотворче, скорый наш помощниче! Тебе прославляем и тебе величаем, яко надежду всех христиан, источник чудес, защитителя верных, болящим врача безмезднаго, вдов и сирот питателя и заступника, целомудрия хранителя и всем сущим в скорбех скораго предстателя и помощника. Услыши нас молящихся тебе и прибегающих под кров твой, яви на нас многую твою милость, и исходатайствуй нам от Всевышняго богоприятными твоими молитвами вся полезная ко спасению душ и телес наших; сохрани град наш Ростов и вся грады и страны христианския и люди живущия в них от всякаго озлобления помощию твоею. Темже верою и любовию твоею святую память чтуще и неотступно твоей пречестней раце предстояще, аще и грешни есмы, со умилением и теплыми слезами воспети тебе дерзаем сицевая: радуйся, яко измлада Всесвятыя Троицы чистое обителище был еси и всеусердно во всей твоей жизни Той поработал еси; радуйся, яко всем с верою приходящим реку чудес твоих изобильно излиял еси; радуйся, христиан всех теплый к Богу молебниче; радуйся, граду нашему Ростову похвало и утверждение, и якоже ныне, тако и при кончине нашей испроси у Христа Бога обрести нам велию милость. Аминь.
Тропарь блаженному Иоанну Власатому, Ростовскому чудотворцу, глас 8
Явился еси во граде, яко в пустыни, в смиренномудрии, чистоте и в трудех, и подвизех, и в терпении мнозе, преблаженне отче Иоанне. Взем бо Крест Христов, последова Ему и бе в молитвах и в псалмопении иноязычного речения день и нощь о спасении всего мира христианскаго, и преселился еси Невечернему Свету. Ныне же ко гробу твоему верни приодящии, молящеся Господеви, Богородице и Предтечи, и приемлют исцеления молитвами твоими. Но присно за ны молися, блаженне отче Иоанне, спастися душам нашим.
Ин тропарь, глас 4
Явился еси во граде, яко в пустыни, смиренномудрием и чистотою и, взем Крест Христов, последовал Ему в трудех и подвизех и в терпении мнозе, преблаженне отче Иоанне. И ныне моли о нас, совершающих память твою и усердно притекающих к раце мощей твоих, избавитися от бед и душам нашим подати велию милость.
Кондак, глас 8
Христовою любовию уязвився, отче Иоанне блаженне, вышния красоты желая, земная же вся презре и ни во чтоже вмени; и на земли ангельское житие препроводи, в вечный покой достиже, идеже глас празднующих, с нимиже молися за ны и душам нашим прощение и телесем исцеление даруй.
Ин кондак, глас 2
Христовою любовию уязвився, отче Иоанне блаженне, вышния красоты желая, земная же вся презре и ни во чтоже вмени, и на земли ангельское житие имея, преселился еси в вечный покой, идеже, предстоя Христу Богу, моли спастися нам и всему христианскому роду, яко да зовем ти: радуйся, преблаженне отче Иоанне.
Величание
Ублажаем тя, святый праведный Иоанне, и чтим святую память твою, ты бо молиши за нас Христа Бога нашего.
4/17 сентября
Обретение мощей святителя Иоасафа, епископа Белгородского, чудотворца (1911).
Второе обретение мощей святителя Митрофана, епископа Воронежского (1989).
Иконы Божией Матери, именуемой «Неопалимая Купина» (1680).
Молитвы святителю Иоасафу, епископу Белгородскому
Молитва первая
из акафиста
О святителю Христов, Иоасафе, чудотворче Белоградский! Веруем грешнии и недостойнии, яко очи Господни на праведных и уши Его на молитву их, и того ради к молитвам твоим прибегаем и ходатайства твоего за нас просим, по глаголу апостольскому уповающе, яко любы твоя николиже отпадает. Во гресех и болезнех наших льну курящемуся и трости сокрушенней уподобихомся, и, аще живем, милостию Бога живем и за молитвы праведник Его. Преклони убо и ты, отче праведне, сердце твое к молению нашему, и предстательством твоим даждь роду христианскому от Господа мир и благословение, Православие укрепи, нападения же лукавнующих и беззаконных на Церковь Божию отжени. Умоли Отца Небеснаго избавитися нам от нашествия вражескаго, от междоусобий же и смятений народных, от губительных поветрий и смертоносныя язвы, от глада, огня, потопа и иных бед и обстояний. Испроси у Христа Бога душам нашим крепость и телесем нашим потребное здравие, болезнем же исцеление: хромым – хождение, слепым – прозрение, разслабленным – утверждение, печальным – утешение и от всех скорбей избавление.
Отпадшия же лозы Христовы ветви паки тою соедини, еяже и сам причастник быти сподобился еси, да тако прославится тобою Пречестное и Великолепое имя Бога нашего, Отца и Сына и Святаго Духа, ныне и присно и во веки веков. Аминь.
Молитва вторая,
глаголемая пред честными мощами святителя
О великий угодниче Божий и преславный чудотворче, святителю Иоасафе! От дальних и ближних градов и весей сошедшеся, во еже на месте подвигов твоих помолитися и многоцелебныя мощи твоя облобызати, из глубины сердца взываем тебе: жезлом благости, якоже пастырь добрый, упаси заблуждшия овцы стада Христова, во дворы Господни сия всели, огради нас от соблазна, ересей и расколов, научи во странствии сущих горняя мудрствовати; разсеянный ум наш просвети и на путь истины направи, охладевшее сердце согрей любовию ко ближнему и ревностию к исполнению велений Божиих, грехом и нерадением ослабленную волю нашу оживотвори благодатию Духа Всесвятаго; да твоему пастырскому гласу последующе, сохраним в чистоте и правде души наша, и тако, Богу помогающу, Небеснаго Царствия достигнем, идеже купно с тобою прославим Пречестное и Великолепое имя Отца и Сына и Духа Святаго во веки веков. Аминь.
Молитва третья
благодарственная
О великий святителю наш и чудотворче предивный Иоасафе, скорый помошниче к тебе припадающим!
Милостивно призри на нас недостойных, со слезами умиления зде молящихся и благодарение тебе по силе приносящих. Благодарим тя, угодниче Христов, яко услышал еси моления нас недостойных и просимая нам изобильно даровал еси. Вемы и усты исповедуем, яко воистину Христови теплый о нас еси молитвенник и, по данней ти благодати и дару, во спасение всем нам потребная даруеши: болящия исцеляеши, страждущия утешаеши, мир и отраду скорбным сердцам изливаеши, плачущия радоватися твориши, печальныя ликовати содеваеши, родителем чада воздравляеши, супругам подружия от одра смертнаго возставляеши, враждующия умиротворяеши, завистливыя твориши милостивы, и всякия неправды караеши, якоже и в житии твоем правды и милосердия мужественный ревнитель был еси. Благодарим тя, святителю, за великая твоя и нам явленная благодеяния, и смиренно молимся тебе мы, недостойнии: предстательствуй за нас у престола Христова и помози нам память присную твоих благодеяний и щедрот на нас излиянных хранити, да во смирении сердца прочее совершим житие, и Небесное да наследуем селение Божественное, молитвами твоими, во веки веков. Аминь.
Молитва четвертая
о недугующих и страждущих
О великий угодниче Христов, святителю отче наш Иоасафе, скорый помощниче и дивный чудотворче! Призри милостивно на ны недугующия. Вемы, угодниче Христов, вемы, и усты и сердцем исповедуем, яко по делом нашим беды постигоша нас. С разбойником благоразумным исповедуем Господеви, яко достойная по делом нашим восприемлем и злая сия якоже раби неключимии терпим. Сими бо временными мученьми Господь Милосердый сокрушает гордыню и жестоковыйное сердце наше, да вечныя избежим казни, грешником уготованныя: сеяхом бо семена жития своевольнаго, и жнем терния скорбей. Обаче, немощни суще, но в покаяние теплое пришедше, о сем молитися дерзаем, да гнев Господень на милость к нам приложится, и тебе, святителю Божий и чудотворче, усердно просим: пролий теплую молитву твою ко Христу Господу нашему, Емуже днесь предстоиши и молишися о почитающих тя с любовию и смиренным на твое предстательство упованием. Се бо в житии твоем, святителю Христов, ни единаго же скорбяща и милости твоея просяща, грехи же своя исповедающа, николиже презрел еси. Умоли Праведнаго Судию, да преложит гнев правды Своея на милование наше. Благодатию Его тебе данною, святителю милосердый, уврачуй наша немощи, болезней лютых течения устави, смерти отити повели, и на покаяние силу нам даруй. Старость поддержи, младенцы воспитай, юность уцеломудри, супружества в чистоте и смирении утверди, нам же всем послушание трудолюбное и мирное жительство молитвою твоею даруй, да терпением течем на предлежащий нам подвиг жития сего временнаго, взирающе на Начальника веры и Совершителя Господа Иисуса, Емуже слава во веки веков. Аминь.
Молитва пятая
в день прославления святителя
В великий и празднственный день сей, день твоего на земли прославления, святителю отче наш Иоасафе, земли нашея славо и радование великое, приими сия смиренная и теплая моления наша. Днесь зрим исполнившийся глагол Господень: прославляющия Мя прославлю. Се бо во дни земнаго жития твоего ничесоже искал еси, точию еже волю Божию исполняти и чада паствы твоея управити во спасение, и того ради многия труды, скорби, болезни и путешествия подял еси. По скончании же твоем прослави тя милосердый Господь, телеси твоему нетление и силы целебныя даровавый, тем же токи исцелений молящимся источил еси, и призывающим тя недугующим и скорбящим многажды являлся еси, утешение и цельбу скорую тем подавая. Сего ради, якоже избранника Божественныя благодати тя ведущи, Церковь Христова днесь прославити тя, якоже новаго чудотворца земли нашея сподобися. Благослови убо и помилуй, архиерею истиннаго Бога, страну нашу Российскую, воинам мужество непоколебимое даруй, и вся люди безпечальны сохрани. Изжени всякую крамолу и крамольных человек лукавая разруши советования, паче же тех самых в покаяние приведи. Пастырем и архиереем подаждь премудрость, чистоту и праведное житие, якоже и сам сими украшался еси. Младенцем воспитание благое даждь, юныя научи, болящим и скорбящим здравие испроси. Сущим во трудех терпение и упование посли, богатым смиренномудрие и ко ближним милосердие даруй. Нам же всем радость о Господе присную подаждь, да вси благодарне тя ублажаем, глаголюще тако: величаем тя, святителю отче Иоасафе, и чтим святую память твою, ты бо молиши за нас Христа Бога нашего.
Тропарь святителю Иоасафу, епископу Белгородскому, глас 3
Святителю, Христу Богу возлюбленне, правило веры и образ милосердия людем был еси, бдением же, постом и молитвою, яко светильник пресветлый, просиял еси и прославлен от Бога явился еси: телом убо в нетлении почивая, духом же Престолу Божию предстоя, чудеса преславно источаеши. Моли Христа Бога, да утвердит нас в Православии и благочестии и спасет души наша.
Ин тропарь, глас 2
Молитвенниче издетска преизрядный, богоизбранный святителю Христов Иоасафе, правило веры и образ милосердия благочестным житием всем являеши и с верою к тебе притекающим обильно исцеления источаеши. Моли Христа Бога, да утвердит правоверие, мир и благочестие и спасет души наша.
Кондак, глас 8
Многоразличныя подвиги жития твоего кто исповесть? Многообразныя милости Божия, тобою явленныя, кто исчислит? Дерзновение же твое у Пречистыя Богородицы и Всещедраго Бога добре ведуще, во умилении сердечнем зовем ти: не лиши и нас твоея помощи и заступления, святителю Христов и чудотворче Иоасафе.
Величание
Величаем тя, святителю отче Иоасафе, и чтим святую память твою, ты бо молиши за нас Христа Бога нашего.
Святителю Иоасафу, епископу Белгородскому, молятся о помощи в строительных работах.
Молитвы святителю Митрофану, епископу Воронежскому
Молитва первая
из службы с акафистом
О всехвальный святителю Христов и чудотворче Митрофане! Приими сие малое моление от нас грешных, к тебе прибегающих, и теплым твоим предстательством умоли Господа и Бога нашего, Иисуса Христа, яко да призрев на ны милостивно, подаст нам согрешений наших вольных и невольных прощение, и, по велицей Своей милости, избавит нас от бед, печалей, скорби и болезней душевных и телесных, обдержащих нас: да подаст земли плодоносие и вся на пользу настоящаго жития нашего потребная; да дарует нам скончати житие сие привременное в покаянии, и да сподобит нас, грешных и недостойных, Небеснаго Царствия Своего, во еже со всеми святыми славити Его безконечное милосердие, со Безначальным Его Отцем и Святым и Животворящим Его Духом, во веки веков. Аминь.
Молитва вторая
из службы с акафистом
Святителю отче Митрофане, нетлением честных мощей твоих и многими благодеяньми, чудесно содеянными и содеваемыми тобою с верою к тебе притекающим, уверившеся, яко имаши велию благодать у Господа Бога нашего, да ниспослет всем, чтущим святую память твою и усердно к тебе прибегающим, богатыя милости Своя: да утвердит во святей Своей Православней Церкви живый дух правыя веры и благочестия, дух ведения и любве, дух мира и радости о Дусе Святе, да вси члены ея, чисты от мирских искушений и плотских похотей и злаго действия злых духов, духом и истиною покланяются Ему и усердно пекутся о соблюдении заповедей Его ко спасению душ своих. Пастырем ея да даст святую ревность попечения о спасении людей, им вверенных, да неверующих просветят, неведущих наставят, сомневающихся вразумят и удостоверят, отпадших от Православныя Церкве обратят в святыя недра ея, верующих соблюдут в вере, грешных подвигнут к покаянию, кающихся утешат и укрепят в исправлении жизни, раскаявшихся и исправившихся утвердят в святости жизни: и тако всех введут указанным от Него путем в уготованное Вечное Царство святых Его. Избранным для управления и суда да ниспослет усердие, прозорливость, мудрость и верность, да управляют и судят к спокойствию и радости всех; всем же людем да дарует мир, тишину, безмятежие, усердие в исполнении заповедей Его, установлений святыя Церкве и закона гражданскаго, и изобилие в потребном для жизни сея; и да избавит грады и веси от глада, труса, потопа, огня, меча, нашествия иноплеменных, междоусобныя брани, смертоносны я язвы и от всякаго зла. Ей, святителю Божий, да устроиши молитвами твоими вся благая душам и телесем нашим: да и мы прославим в душах и телесех наших Господа и Бога нашего Иисуса Христа, Емуже со Отцем и Святым Духом слава и держава во веки веков. Аминь.
Молитва общая святителям Христовым Митрофану и Тихону, Воронежским чудотворцам
из службы
О велицыи угодницы Божии, крепцы и наши заступницы и молитвенницы, всехвальнии святителие Христови и чудотворцы Митрофане и Тихоне! Услышите нас, к вам припадающих и с верою вас призывающих. Поминайте нас у Престола Вседержителя и молитеся о нас непрестанно ко Христу, Богу нашему, дадеся бо вам благодать молитися за ны. Умолите предстательством вашим Всемилостиваго Бога нашего, да подаст Он Церкви Святей мир, пастырем ея – силу и ревность подвизатися о спасении людей и всем нам – дар, коемуждо потребен: веру истинную, надежду твердую и любовь неоскудевающую, да сохранит нас от глада, губительства, труса, потопа, огня, меча, нашествия иноплеменных, междоусобныя брани, смертоносныя язвы, внезапныя смерти и от всякаго зла; юным и младенцем да дарует благое в вере возрастание, старым и немощным – утешение и подкрепление, болящим – исцеление, сиротам и вдовицам – милость и заступление, заблуждшим – исправление, бедствующим – благовременную помощь. Не посрамите нас во уповании нашем, споспешествуйте, яко отцы чадолюбивии, и нам понести иго Христово во благодушии и терпении, и всех управите в мире и покаянии непостыдно скончати живот свой и Царствия Небеснаго сподобитися, и деже вы ныне водворяетеся со Ангелы и всеми святыми, прославляюще Бога, в Троице славимаго, Отца и Сына и Святаго Духа. Аминь.
Тропарь святителю Митрофану, епископу Воронежскому, глас 4
Правило веры и образ кротости словом и житием пастве твоей, отче смиренномудре Митрофане, был еси. Темже и во светлостех святых солнца светлейши возсил еси, венцем нетления и славы украшаемь, моли Христа Бога стране нашей и граду твоему в мире спастися.
Кондак, глас 8
Воздержанием тело духу поработив, душу же равноангельну сотворив, святительскою одеялся еси одеждою, яко венец священства, и ныне, всех Владыце предстоя, моли, всеблаженне Митрофане, умирити и спасти души наша.
Величание
Величаем тя, святителю отче Митрофане, и чтим святую память твою, ты бо молиши за нас Христа Бога нашего.
Святителю Митрофану Воронежскому молятся о помощи в заботе о должности или другом каком занятии для взрослых детей.
Молитвы ко Пресвятой Богородице пред Ее иконою «Неопалимая Купина»
Молитва первая,
чтомая в Новгородском Юрьеве монастыре
Царице Небесная, Владычице наша, Госпоже вселенныя, Пресвятая Богородице, нескверная, неблазная, нетленная, пречистая, чистая Приснодево, Марие Богоневесто, Мати Творца твари, Господа славы и Владыки всяческих!
Тобою Царь царствующих и Господь господствующих прииде и на земли нам явися. Ты убо Божие милосердие воплощенное. Ты Мати Света и Живота сущи, якоже некогда во чреве Твоем носила еси Его и на обятиих Твоих имела еси Младенца Слово Превечное, Бога, тако и всегда Того с Собою имаши.
Сего ради мы по Бозе к Тебе прибегаем, яко к нерушимей стене и предстательству: призри благосердием, Всепетая Богородице, на лютое озлобление наше, и исцели душ и телес наших болезни, отжени от нас всякаго врага и супостата, избави от глада, мора, от язвы, от вод многих и воздухов тлетворных, и от смерти внезапныя; и якоже три отроки в пещи вавилонстей, сохрани и соблюди нас, да якоже древле людем Божиим, тако будут вся благая нам чтущим Тя; врази же и вси ненавидящии нас да постыдятся и посрамятся, и уразумеют вси, яко с Тобою Господь, о Владычице, и Тобою с нами Бог.
Во дни осени нас сению благодати Твоея, во тьме же нощней просвети светом свыше, всем полезная устрояющи; преложи горесть нашу во сладость и слезы утри согрешивших и бедствующих раб Твоих, исполняющи коегождо прошения вся во благо; вся бо можеши, елика хощеши Ты, Мати Слова и Живота.
Тебе Отец венча Дщерь, Сын Матерь Деву, Дух Святый Невесту, да царствуеши яко Царица, предстоящи одесную Святыя Троицы, и милуеши нас якоже хощеши, ныне и присно и во веки веков. Аминь.
Молитва вторая
из акафиста
О Пресвятая и Преблагословенная Мати Сладчайшаго Господа нашего Иисуса Христа! Припадаем и покланяемся Тебе пред святою и пречестною иконою Твоею, еюже дивная и преславная чудеса содеваеши, от огненнаго запаления и молниеноснаго грома жилища наша спасаеши, недужныя исцеляеши и всяко благое прошение наше во благо исполняеши. Смиренно молим Тя, всесильная рода нашего Заступнице: сподоби ны, немощныя и грешныя, Твоего Матерняго заступления и благопопечения. Спаси и сохрани, Владычице, под кровом милости Твоея Церковь Святую, обитель сию (или: град сей, или: весь сию), всю страну нашу православную и вся ны, припадающия к Тебе с верою и любовию и со умиленными слезами Твоего заступления просящия. Ей, Госпоже Всемилостивая! Умилосердися на нас, обуреваемых грехи многими и не имущих дерзновения ко Христу Господу просити Его о помиловании и прощении: Тебе убо предлагаем к Нему на умоление, Матерь Его сущую. Простри, о Всеблагая, к Нему богоприимнеи руце Твои и предстательствуй за нас пред Его благостию, просящи нам прощения прегрешений наших, благочестнаго мирнаго жития, благия христианския кончины и добраго ответа на страшнем суде Его. В час же грознаго посещения Божия, аще огнем возгорятся домове наши, аще ли молниеносным громом устрашаеми будем, яви нам милостивое Твое заступление и державное вспоможение да спасаеми всесильными Твоими ко Господу молитвами, временнаго наказания Божия зде избегнем, вечное же блаженство райское тамо унаследуем и со всеми святыми воспоем пречестное и великолепое имя покланяемыя Троицы, Отца и Сына и Святаго Духа, и Твое велие к нам милосердие, во веки веков. Аминь.
Молитва третья
из акафиста
О Пресвятая Дево, Мати Господа Вышняго, Заступнице и Покрове всех, к Тебе прибегающих! Призри с высоты святыя Своея на мя грешнаго, припадающаго ко пречистому и чудотворному образу Твоему, услыши мою теплую молитву и принеси ю пред возлюбленнаго Сына Твоего, Господа нашего Иисуса Христа; умоли Его, да озарит мрачную мою душу светом Божественныя благодати Своея, да избавит мя от всякия нужды, скорби и болезни, да ниспослет мне тихое и мирное житие, здравие телесное и душевное, да умирит страждущее сердце мое и исцелит раны его, да наставит мя на добрая дела, очистит ум мой от помышлений суетных, наставит мя ко исполнению заповедей Своих, избавит от вечныя муки и не лишит Своего Небеснаго Царствия. О Пресвятая Богородице, Ты, всех скорбящих Радосте, услыши и мя скорбнаго. Ты, именуемая Утоление печали, утоли и мою печаль. Ты, Купино неопалимая, сохрани мир и всех нас от вредоносных, огненных стрел врага. Ты, Взыскание погибших, не попусти и мне погибнути в бездне грехов моих. На Тя по Бозе вся моя надежда и упование! Буди мне в жизни временней Заступница и о жизни вечней пред возлюбленным Сыном Твоим, Господем нашим Иисусом Христом, Ходатаица.
Научи мя служити Ему с верою и любовию и благоговейно чтити Тебе, Пресвятая Мати Божия, Преблагословенная Марие! Твоим святым молитвам вручаю себе до скончания дней моих. Аминь.
Тропарь Божией Матери ради иконы Ее «Неопалимая Купина», глас 4
Иже во огни купины неопалимыя, древле Моисеем виденныя, тайну воплощения Своего от неискусобрачныя Девы Марии Прообразовавый, Той и ныне, яко чудес Творец и всея твари Создатель, икону Ея святую чудесы многими прослави, даровав ю верным во исцеление недугов и в защищение от огненнаго запаления. Сего ради вопием Преблагословенней: надеждо христиан, от лютых бед, огня и грома избави на Тя уповающия и спаси души наша, яко милосерда.
